ТIахьавин ривайатехь аьлла: «АллахIан элчано (АллахIера къинхетам а, маршо  а хуьлда цунна), эца бакъо алсам кхочуш ю аьлла, сацам бира юкъахь долучу муьлхха а хьолан хьокъехь» (ХIокху хьадисан хIара ривайат дийцинарш теша хьакъ бу. Ат-ТIахьави: 4/126).

773. Анас ибн Малика (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Лулахо алсам бакъо йолуш ву хьан цIа эца» (ХIара хьадис ан-Насаис далийна:4/69, ткъа ибн Хьиббана бакъ хьадис ду а аьлла хIара. Делахь а, хIокху хьадисан хьулдина кхачамбацар ду).

774. Iамр ибн аш-Шарида дийцина: «Абу РафиIа (АллахI реза хуьлда цунна), мах а бийцина диъ эзам мискъалах, шен цIа СаIд ибн Маликан дIа а доьхкина, тIаккха элира: «Нагахь сайна АллахIан элчано (АллахIера къинхетам а, маршо а хуьлда цунна) олуш ца хезнехьара: «Лулахо кхин болучарел а алсам бакъонаш йолуш ву» аьлла, сайн цIа хьуна духкур ма дацара аса» (ал-Бухари: 2258).

775. Жабира (АллахI реза хуьлда цунна) дийцина, АллахIан элчано (АллахIера къинхетам а, маршо  ахуьлда цунна) элира аьлла: «Нагахь шина лулахочуьнан долахь латтанаш (бахамаш) некъ юкъара болуш делахь - лулахочунна кхачош ю алсам йолу (шен лулахочун латта) эца бакъо. Йохкархо шен лулахочо цхьа сацам баре хьоьжуш Iан везаш а ву, цIахь воцуш вахана велахь а» (ХIара хьадис далийнарш: Ахьмад: 3/303, Абу Дауд: 3517, ат-Тирмизи: 1369, ан-Насаи: 2/229, ибн Мажа: 2494. Ткъа хьадис дийцинарш шайх теша хьакъ берш бу).

776. Ибн Iумара (АллахI реза хуьлда цунна а, цуьнан дена а) дийцина, пайхамара (АллахIера къинхетам а, маршо а хуьлда цунна) элира аьлла: «(ШарIо) эца (кхачийна) алсам (я хьалхара) бакъо эшор - архаш дIаястар санна лоруш ду» (ХIара хьадис далийнарш: ибн Мажа: 2500, ал-Баззар. ТIаьххьарчо кхин а тIетоьхна оцу аьллачуна: «Эца алсам йолу бакъо ца кхочу вахана цIахь воцучунна»).