728. Анас ибн Малика (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) Iаьржа бос эццалц кемсаш йохкар (ца магийра). Иштта буьртиг болу ялта дохкар а ца магийра - буьртиг чIагIбаллалц» (ХIара хьадис далийнарш Ахьмад: 3/221, Абу Дауд: 3371, ат-Тирмизи: 1228, ибн Мажа: 2217. Ткъа ибн Хьиббана а: 4972, ал-Хьакима а: 2/19 бакъ хьадис ду аьлла хIара).

729. Жабир ибн IабдуллахIа (АллахI реза хуьлда цунна а, цьунан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Нагахь ахьа хьайн вешина стом боьхкинехь, цул тIаьхьа Iаламан бохамаш бахьанехь иза телхинехь, - цуьнгара цхьа а хIума схьаэца бакъо яц хьан. Муха оьцу ахьа харцонца хьайн вешин бахам схьа?» (Муслим: 1554). 

Оццу хьадисан кхечу ривайатехь дийцина: «Пайхамара (АллахIера къинхетам а, маршо а хуьлда цунна) омра дира: Iаламан бохамаша дина зенаш меттахIиттаде аьлла».

730. Ибн Iумара (АллахI реза хуьлда цунна а, цуьнан дена а) дийцина, пайхамара (АллахIера къинхетам а, маршо а хуьлда цунна) элира аьлла: «Нагахь стага дургал эдиначул тIаьхьа хурмин дитт доьхкинехь - оцу тIера стом иза доьхкиначуьнан бу, нагахь иза эцначо ша оьцучу юккъехь (дургал эдинарг цхьана механа юкъабогIуш бу аьлла) билгалдаьккхина ца хиллехь» (ал-Бухари: 2379, Муслим: 1543.