368. IабдуллахI ибн Iаббаса (АллахI реза хуьлда цунна а, цуьнан дена а) дийцина: «СаIд ибн Iубудата (АллахI реза хуьлда цунна), шен нанас нузар дар а, амма и кхочуш а дале иза елла хилар а АллахIан элчане (АллахIера къинхетам а, маршо а хуьлда цунна) дийциначу хенахь, АллахIан элчано (АллахIера къинхетам а, маршо а хуьлда цунна) аьлла: «Цуьнан цIарах кхочушде и» (ал-Бухари: 2761, Муслим: 1638).

369. КаIб ибн Малика (АллахI реза хуьлда цунна) дийцина: «Аса элира: «ХIай, АллахIан элча! Сайн тоба къобалдарна (шукар деш) сайн мел болу бахам АллахIан а, Цуьнан элчанан а дуьхьа къечарна дIасабекъа лууш ву-кха со!». (Оцу хьокъехь) АллахIан элчано  (АллахIера къинхетам а, маршо а хуьлда цунна) элира: «Хьайн бахамах цхьаберг хьайн долахь Iадбита, хIунда аьлча и гIолехь хир ду хьуна» (Бухари: 6690, Муслим: 2769).