Билгалдиначу хIуманна дуьхьал лелон латтанаш дала а, эца а мегаш хилар а, нийса доцу бехкамаш хIиттор магийна цахилар а дуьйцу дакъа

287. РафиI ибн Хадижа (АллахI реза хуьлда цунна) дийцина: «Ансарашна юккъехь латтанаш дукхаха лелош дерш дара тхо. Лелон латтанаш оьцура оха: цигара (цхьана агIонна тIехь даьлла ялта) тхан хир долуш, ткъа (цуьнан дена - вукху агIонна тIехь кхиъна ялта) кхочур долуш. Цкъацкъа ялтин (билгалдина) цхьа дакъа телхара, ткъа важа дийна дуьсура. Цкъацкъа бIостанехьа а нислора. (Эххар тIаьхьа Пайхамара (АллахIера къинхетам а, маршо а хуьлда цунна)) дихкира тхуна (оцу кепара латтанаш лелон мехаш дар). Амма (латта лелорна дуьхьал) деши а, дети а (луш мах барах) дерг аьлча, ткъа иза дехка ца дихкира цо тхуна» (ал-Бухари: 2327, Муслим: 117/1547).

288. Хьанзала ибн Къайса (АллахI реза хуьлда цунна) дийцина: «Мухха а цкъа РафиI ибн Хадиже (АллахI реза хуьлда цунна) хаьттира аса: «Йолах пайдаэца дIадала мегий-те латтанаш дешина а, детина а дуьхьал». Цо жоп делира: «Цхьа а вон хIума дац цуьнгахь. АллахIан элча (АллахIера къинхетам а, маршо а хуьлда цунна) дийна волучу хенахь наха латтанаш лелон дIалора - уьш лелочарна цигара кхочу долу ялта татолашна йистошкахь кхиънарг, Iаьмнашна гонаха кхиънарг я аренан гIеххьачу меттигашкахь кхиънарг хир долуш. Ткъа оцу латтанех, цхьадерг хIаллак а хилла, важадерг дийна дуьсуш а нисделира. Важа дийна а дисина, (къастийнарг) хIаллак хуьлуш а нисделира. И бахьанехь, нахана догIу дакъа дуьззина дIа ца кхочуш, хьал хIоьттира. Цундела АллахIан элчано (АллахIера къинхетам а, маршо а хуьлда цунна) оцу тайпана хIума ца магош дихкира. Амма цхьа а вон хIума лоруш дац ахьа билгалбиначу мехах латта лелон даларах» (Муслим: 116/1547).