221. IабдуллахI ибн Iаббаса (АллахI реза хуьлда цаьршинна) дийцина: «АллахIан элча (АллахIера къинхетам а, маршо а хуьлда цунна) шен асхьабашца цхьаьна Макка веаначу хенахь, мушрикаша элира: «Кхуза, шу долучу, богIуш цхьа нах бу, Ясриберчу хоршано гIора а дайина». ХIетахь Пайхамара (АллахIера къинхетам а, маршо а хуьлда цунна) цаьрга омра дира: (хьаьжцIенна гонаха дохучу гонех) хьалхара кхо го чехкачу боларца баккха, ткъа шина маьIигна тIехдовлучу хенахь гуттарчу боларехь тIехдовла аьлла. Царех къахетар бахьанехь Iийра иза, цаьрга омра ца деш: (ворххIе а) го чехкачу боларехь баккха аьлла» (ал-Бухари: I602, Муслим: 1266).

222. IабдуллахI ибн Iумара (АллахI реза хуьлда цунна) дийцина: «АллахIан элчано (АллахIера къинхетам а, маршо а хуьлда цунна), ша Макка а веана, Iаьржачу тIулгах дIа а хьакхавелла, гонаш даха волалучу хенахь, чехкачу гIулчашца ворхIаннах (хьалхара) кхо го боккхуш гира суна» (ал-Бухари: 1603, Муслим: 1261).

223. IабдуллахI ибн Iаббаса (АллахI реза хуьлда цаьршинна) дийцина: «Пайхамара (АллахIера къинхетам а, маршо а хуьлда цунна) тIаьххьара дина хьаьж дечу хенахь эмкалахь тIаваф дира, шен саттийна тIам болу Iаса хьаьжцIийнан сонах хьакха а йолуьйтуш» (ал-Бухари: 1607, Муслим: 1272).

224. IабдуллахI ибн Iумара (АллахI реза хуьлда цунна а, цуьнан дена а) дийцина: «Пайхамара (АллахIера къихетам а, маршо а хуьлда цунна) хьаьжцIийнах, Йеменан ши са боцучу цхьана а меттигах, хьакхалуш ца вайра суна» (ал-Бухари: 1609, Муслим: 1269).