Бер оьзда кхетош-кхиорхо а, доьзална Ислам-динан гIиллакхаш хьеха деза да-нана а сутара хила дезачу коьртачу декхарех ду - доьзалхочунна шена тIехь долу ден-ненан хьаккъаш довзийтар. Ткъа цаьршиннан хьаккъашна юкъадогIу: царна дика хилар, цаьршинна муьтIахь хилар, цаьршиннан хьашташ кхочуш деш дIахIоьттина хилар, и шиъ доккха хилча цаьршинна Iуналла дар, и шиъ къанделча цаьршинга леррина хьажар, цаьршиннан озал аз цаайдар, цаьршинна тIецачийхар, и шиъ делча цаьршинна доIа дар… Уьш доцурш кхин а ду Ислам-дино важиб а дина тIедехкина ден-ненан хьаккъаш а, деца-ненаца лелон дезаш долу гIиллакхаш а, деца-ненаца лелон езаш йолу оьзда юкъаметтиг а...

Ислам-дино хIума яарна а, хи маларна а ларийна гIиллаккхаш ду. Доьзалхочунна уьш Iамо а, хьеха а, оцу гIиллакхашца бераш нисдан а декхарийлахь ду да-нана а, кхетош-кхиорхо а, иштта берах жоьпаллехь мел верг а. И гIиллакхаш лахарачу рогIехь ду.

Салам даларан шен къасттийна гIиллакхаш ду. Цундела бераш кхетош-кхиорхо а, да-нана а декхарийлахь ду: оцу гIиллакхашка берашкахь орам хецийта а, уьш берийн амале дерзо а, бераш цаьрга марздан а, уьш церан Iадате дерзийта а, цаьргахь уьш чIагIдалийта а.

Бераш кхетош-кхиорхочунна атталлина вай уьш (гIиллакхаш), кеч а дина, нис а дина, лахарачу рогIехь охьаяздина:

А) Берана Iамо дезаш ду: салам далар – ШарIо, омра а дина, тIедиллина хилар